Dino Melaye: Ndị uweojii achọghị ịpụ n'ụlọ ya na-anwụchighi ya

Akụkọ dị mkpa:

Dino Melaye na ndị uweojii

Ndị uweojii Naịjirịa ekwuola na ha agaghị esi n'ogige ụlọ Sinetọ Dino Melaye pụọ ma ọ bụghị ma ọ bịara kpesa onwe ya n'aka ha dịka o kwesịrị ime kemgbe.

Image copyright Instagram/Dino Melaye

Mana na mkparịtaụka ya na ndị ntaakụkọ Channels TV nwere n'ekwentị, Melaye kwuru na ọ bụghị omempụ, na ọ ga-egosi ndị uweojii onwe ya n'izu na-abịa mgbe ọ batara Abuja.

Cheta na ndị uweojii na-ebo ya ebubo ịma maka ndị omekome gbara otu onye uweojii egbe.

E liela Shagari:

E tinyela ozu aka chịburu Naịjirịa bụ Shehu Shagari n'ala dịka ndị alakụba si eli ozu.

Cheta na Shagari dị afọ iri itoolu na atọ nwụrụ n'ụbọchị iri abụọ na asatọ nke ọnwa Disemba a, n'ụlọọgwụ dị n'Abuja ka ọ rịachara obere ọrịa oyi ịba n'ahụ a kpọrọ "pneumonia".

Lee foto si n'olili ya:

Gana mere ntuliaka

Onyeisiala ndị mba Gana bụ Nana Akufo-Addo etoola ndị isioche ụlọorụ ntuliaka ha maka mbọ ha gbara ịhụ na usoro ndị mmadụ binyere aka n'akwụkwọ ga-eme ka ekewapụta mpaghara ọhụrụ, gara were were.

N'egwuregwu,

Cristiano Ronaldo nyere goolu abụọ mere ka Juventus merie Sampdoria.

Image copyright Getty Images

Goolu a butere ole o nyere n'afọ 2018 a na iri anọ na itoolu, nke bụ mbụ ọ na-enyerughi goolu iri ise n'ime afọ asatọ gara aga.

Egwu Eke nke atọ

Ụfọdụ ụmụ Naịjirịa akatọọla egwueke nke atọ ndị agha Naịjirịa kwuru na ha ga-amalite n'akụkụ Naịjirịa niile ka ha jikere maka nsogbu ọ bụla nwerike ipụta mgbe a na-akwado, mgbe a na-eme maọbụ mmecha ntuliaka 2019 na-abịanụ.

Image copyright Getty Images
Nkenke aha onyonyo Ndị agha Naịjirịa na-adị njikere maka Egwu Eke atọ

Onyeisi ndị agha Naịjirịa bụ Tukur Buratai, kwuru na egwu eke atọ ga-ebido n'ụbọchị mbụ nke ọnwa Jenụwarị ma kwụsị n'ụbọchị iri abụọ na asatọ nke ọnwa Febrụwarị.

Ndị agha Naịjirịa kwuru maka ya bụ Egwu Eke na Twitter:‏

Lee ihe ha kwuru na Twitter

@JabeerJaiz kwuru na ọ na-atụ anya na ya bụ emume ga-aga nkeọma

Ebe ụfọdụ ụmụ Igbo na-ekwu na ọ bụ maka ndị Biafra ka gọọmenti ji ehibe ya bụ "Egwu Eke atọ"

@Michaelche4 kwuru na ya bụ atụmaatụ bụ iji memina ụmụ Naịjịrịa.

N'akụkọ ọzọ,

Image copyright Getty Images
Nkenke aha onyonyo APC napụrụ PDP ọchịchị n'afọ 2015

Ndị otu pati All progressives progressives akpọrọ APC n'ichafu site n'ọnụ na-ekwuchitere ha bụ Lanre Issa-Onilu ndị na-ekwuru ha etiela pati PDP aka n'obi.

Ọ bụ maka ụfọdụ ndị otu ha nwụrụnụ na mberede okporoụzọ mgbe ha gara i so onye otu ha na-azọ oche sineti na Benue steeti achụ nta vootu.

N'ọnụ ha, anyị bụ ndị otu pati APC nwere mgbawa obi maka ihe mberede a mere ndị otu pati PDP, n'ekpekwa ekpere ka Chukwu nọnyere ndị bee ihe a mere.

Ndị otu APC na-arịọkwa dịka emume ndọrọndọrọ ọchịchị gbagotere, ka ndị ọrụ nchekwa na ọrụ na-ahụ njem okporoụzọ kpachapụ anya hụ na emume ndị a enweghị ọdachị ọ bụla.

Nkenke aha onyonyo Ọ bụghị mbụ ana-atọ ndị ụkọchukwu Katọlik

Ndị uweojii nọ na Anambara ekwuola na ha azọpụtala ụkọchukwu Katọlik abuọ ndị ntọ tọrọla ụbọchị iri abụọ nke ọnwa Disemba 2018.

N'ime akwụkwọ ozi onụ na-ekwuchitere ha bụ Haruna Mohammed degara ndị ntaakụkọ, ha kwuru na njikọta aka ha na ngalaba uweojii ndị ọzọ dị na steeti ahụ

mere ka azọpụta ndị ụkọchukwu ahụ ndị ntọ tọrọ.

Ndị Uweojii na Dino Melaye

Image copyright GETTY IMAGES/DINO MELAYE
Nkenke aha onyonyo Ibrahim Idris na Dino Melaye bụ Sinetọ na-anọchite anya ndị Kogi West na-akwata ya maka ebubo mmadụ abụọ ndị uweojii nwụchiri boro ya

Anyị agaghị apụ na bee ya maọbụrụ na anyị anwụchịghị ya.

Ọ bụ ndị ụweojii gbara ụlọ Abuja onye na-anọchite anya ọdịda anyanwụ Kogi steeti n'ụlọomeiwu bụ Dino Melaye kwuru nkea.

Tupu ugbua, ndị uweojii kpọpụrụ Melaye n'ụlọikpe maka ebubo na ha nwetara ngwọagha n'aka ya.

Mana Dino Melaye agwaala ndị ntaakụkọ "Channels" na ya anaghị agba ọsọ kama na ya ga-ewere onwe ya nye n'aka ndị uweojii n'izu ụka na-abịanụ.

N'Egwuregwu,

Image copyright Getty Images

Ndị egwuregwu bọọlụ na-amasị adịla njikere maka ị mata Mbe nabụ nke bụ oke n'etiti Liverpool na Arsenal na mgbede taa bụ ụbọchi iri abụọ na itoolu nke ọnwa Disemba 2018 n'asọmpị Premier League.

Liverpool emeriela asọmpị iri na isii n'ime iri na itoolu ha gbagoro kamgbe a malitere asọmpi Premiere League nke izu a.

N'Ofesi,

Image copyright Reuters
Nkenke aha onyonyo Ndị uweojii na-enyocha ya bụ ụgbọala gbatọsiri agbatọ

Ọgbunigwe gbara n'okporoụzọ agbagbuola mmadụ anọ ma merụọ mmadụ iri na abụọ nọ n'ime ụgbọala na Giza Pyramids dị na mba Egypt,

ndị ọrụ gọọmenti ekwuputala.

E zoro ya bụ ogbunigwe n'akụkụ mgbidi tupu ọgba mgbe ndị a na-agba n'okporoụzọ.

Nkeji Ututu

Ngwaọrụ gị akwadoghi ọkpụkpọ mgbasa ozi
Media captionBBC Nkeji

Ihe nkiri taa

Ngwaọrụ gị akwadoghi ọkpụkpọ mgbasa ozi
Media caption'Ihe dị iche na Ezeigbo na Igwe maọbụ Eze'