Xenophobia: Ụmụ Naịjirịa 187 gbara ọsọ ndụ agaghi alaghachinwu South Africa ruo afọ 5

Ngwaọrụ gị akwadoghi ọkpụkpọ mgbasa ozi
Media captionIhe mere m ji kpọlata ndị Naịjirịa nọ Saụt Afrịka

Ihe ruru mmadụ 187 si mba Saụt Afrịka gbaa ọsọ ndụ lọta Naịjirịa agaghị alagachinwu mba ahụ ruo afo ise.

Ụfọdụ n'ime ndị a lọtara gwara BBC na ụlọọrụ na-ahụ maka ndị mbịarambịa gwara ha na ọ ga-eme afọ ise tupu enye ha ohere ibata mba ahụ ọzọ.

Nke na-eme ka ndị Naịjirịa gunyere ụmụaka, ụmụnwaanyị na ụmụnwoke tụrụ ụkwa n'ọdọugbọelu dị na Legọs n'ime abalị Wenezde.

Image copyright Nigerians in Diaspora Commission
Nkenke aha onyonyo Chairman /CEO, Nigerians In Diaspora Commission, Hon Abike Dabiri-Erewa

Njem ha na-abịa dịka mwakpo ulọahịa na ogbugbu mmadụ mere na mba ahụ butere ezigbote ịgbarụ ihu n'etiti Naịjirịa na mba Saụt Afrịka.

Ka ụgbọelu a bu mmadụ 189 daara, ndị nọ n'ime ya malitere ịgụ egwu na inwe aṅụrị ma na-egosi foto ụlọahịa ha agbara ọkụ.

Samson Aliyu bu onye na-ere akwa na mba Saụt Afrịka sị; "A gbara m ọsọ ndụ. ha gaara egbu m,"

Ọ gakwara n'ihu sị: "Ha gbara ụlọahịa m ọkụ, ihe niile."

Gọọmentị Naịjirịa si na ha na-ele anya mmadụ 600 ịlọta maka ihe a mere.

"Anyi na-eleanya mmadụ 317 mana ọ bụ 189 no n'ime ụgbọleu a lọtara," bụ ihe onye mmekọrịta ndị bi ofesi bụ Abike Dabiri-Erewa kwuru maka ụgbọelu a batara.

Ndi si Saụt Afrịka dịka so ụgbọelu Air Peace lọta.

Allen Onyema bụ onyeisi Air Peace nwetere ezigbote nkwado mgbe ọ banyere ụgbọelu ahụ bụ ndị mmadu lọta.

Ka ọ dị ugbua, Maazị Onyema bụzị aha akpụ n'ọnụ ugbua maka ihe a o mere.

Cheta na ọ bụ ụbọchị a ka e kwuru na a ga-akpọlata ụmụ Naijiria nọrọ Saụt Afrịka dịka nsogbu "xenophobia" nwụrụ ọkụ n'izu gara aga na mba Sauth Afrịka.

Ka ọ dị ka a na-enwe nsogbu na njem a, Abike dabiri Erewa kọwara ndị ntaakụkọ na ngalaba na-ahụ maka njem na mba Saụt Afrịka na-emegharị nnyocha ha mechaburu na mbụ.

"Air Peace anọrọla kemgbe ụzọ ụtụtụ mana ihe ka jichi nfepụ bụ ndị ọrụ njem si mbaga mba bụ ndị kwechiri na ha ga-emekwa nnyọcha ha merela mbụ."

O kwuru na "e nwere mmadụ 317 gụnyere ụmụ nwaanyị 83 na ụmụaka n'akwụkwụọ njem ụgbọelu maka ịlọta."

Nkenke aha onyonyo Ọnọdụ ebe a ga-anapata ndị si Saụt Afrịka alọta

Dabiri-Erewa gara n'ihu kọwara na gọọmenti ga-akwado ndị a na-alọta site na inye ha obere ego maka njem ịla ebe ha si nakwa obere ego iji bido obere ahịa.

Isiokwu Ndị Emetụtara